3. Test imtahanının keçirilmə qaydaları

1. Test imtahanı sual kitabçasından və Cavab kartından istifadə etməklə həyata keçirilir.
2. Sual kitabçası 100 sualdan ibarətdir və 2 (iki) saat müddətində hər bir namizəd həmin sualları cavablandırmalıdır.
3. Namizədlər imtahanın başlanmasına azı bir saat qalmış “İmtahana buraxılış vərəqəsi”ndə göstərilən imtahan keçirilən binanın qarşısına gəlməlidirlər.
4. İmtahana gəlmiş namizəd binanın giriş hissəsində "İmtahana buraxılış vərəqəsi"ni şəxsiyyət vəsiqəsini və hərbi biletini təqdim edərək yoxlamadan keçir. Binanın mühafizə xidmətinin əməkdaşı namizədin binaya daxil olmasına, imtahan üçün ayrılmış zalda öz yerini tutmasına nəzarət edir.
5. Hər bir stol arxasında bir namizəd əyləşə bilər. Namizədlər auditoriyalarda öz yerlərini tutduqdan sonra imtahanın başlanmasına 15 dəqiqə qalmış imtahan nəzarətçisi cavab kartı zərfinin möhürünü açır, cavab kartını paylayır və doldurma qaydalarını izah edir. İmtahan rəhbəri imtahanın başlanmasını elan edir, sual kitabçaları zərfini açır və onların paylanmasını təmin edir.
6. Cavab kartındakı məlumatlar şəxsən namizəd tərəfindən doldurulur və imzalanır. Cavab kartında düzgün cavabın yerləşdiyi hərfli dairə qara və ya tünd göy rəngdə yazan diyircəkli qələmlə doldurulmalıdır. Korlanmış cavab kartı dəyişdirilmir. Bir suala aid olan bir neçə dairə qaralanarsa, həmin cavab etibarsız sayılır və yanlış cavab kimi qiymətləndirilir.
7. İmtahan başa çatdıqdan sonra namizəd cavab kartını nəzarətçiyə təhvil verir və imtahanın nəticələrini öyrənənə qədər zalda gözləmək hüququna malikdir.
8. İmtahanın başa çatması barədə protokol tərtib edilir. Həmin protokol imtahan rəhbəri və nəzarətçilər tərəfindən imzalanır. Protokol və cavab kartları zərfə qoyulur, möhürlənir və Komissiyaya təqdim edilir.